काठमाडौं । एभरेष्ट कलर लिमिटेडले नेपाल गुणस्तर तथा नापतौल विभागबाट नेपाल गुणस्तर प्रमाण चिन्ह प्राप्त गरेको छ । चितवनको खैरहनीमा उद्योग रहेको कम्पनीले विभिन्न विधाका उत्पादनका लागि आधिकारिक रूपमा गुणस्तर प्रमाण चिन्ह प्रमाणित कम्पनीको मान्यता पाएको हो ।

यसअघि सन् २०२३ मा नै अन्तर्राष्ट्रिय स्तरको आईएसओ ९००१ः२०१५ (क्वालिटी म्यानेजमेन्ट सिस्टम) प्रमाणपत्र प्राप्त गरिसकेको एभरेष्ट कलरले अब राष्ट्रिय स्तरको उच्च गुणस्तरको प्रमाणपत्र समेत पाएर उपभोक्ता माझ आफ्नो विश्वसनीयतालाई थप मजबुत बनाएको छ ।

विभागकी महानिर्देशक कुमारी ज्योती जोशीद्वारा स्वीकृत इजाजत पत्रअनुसार कम्पनीले जेठ १८ देखि लागू हुने गरी विभिन्न ब्रान्ड तथा ५०० एमएल, १ लिटर, ४ लिटर, १० लिटर र २० लिटरका साइजहरूमा नेपाल गुणस्तर चिन्ह प्रयोग गर्नेछ ।

कम्पनीका प्रमुख कार्यकारी सरोज लुइँटेलले यो सफलता उपभोक्ता, डिलर तथा प्राविधिकहरूको निरन्तर विश्वास र सहयोगको परिणाम भएको बताए । ’नेपाल सरकारले तोकेको कडा मापदण्ड र गुणस्तर पूरा गरेपछि मात्र प्राप्त हुने एनएस चिन्हले एभरेष्ट कलरका उत्पादनहरू पूर्णरूपमा सुरक्षित र भरपर्दा छन् भन्ने कुरा प्रमाणित गरेको छ,’ उनले भने ।

एभरेष्ट कलरले सर्वसाधारणका लागि सेयर निस्कासन गर्ने तयारी गरेको छ । कम्पनीले विदेशमा रहेका नेपालीका लागि सेयर निष्कासन गरिसकेको छ ।