काठमाडौं । विश्व सम्पदा सूचीमा सूचीकृत बौद्ध क्षेत्रको नजिकै नेपालीपन र आधुनिक सुविधाको एउटा गन्तव्य थपिएको छ । बौद्ध बुटिक इन नाममा खोलिएको पर्यटकीय गन्तव्यले रैथाने कला, संस्कृति र आत्मिय सत्कारलाई एउटै छानामुनि समेट्ने उद्देश्य राखेको छ ।

युवा उद्यमी विवुध लुइँटेलको परिकल्पना र नेतृत्वमा तयार भएको होटलले नेपालको परम्परागत वास्तुकलालाई महत्व दिएको छ । विदेशी तथा स्वदेशी पर्यटकहरूलाई नेपाली मौलिक पहिचान दिने उद्देश्यले युवा उद्यमी लुइँटेलले नेपालको माटो र संस्कृतिको झल्को आउने गरी बौद्ध बुटिक इनको निर्माण गरेका हुन् ।

बौद्ध बुटिक इनको विशेषता यसको निर्माण र साजसज्जामा प्रयोग भएका सामग्री हुन् । बौद्ध बुटिक इनको प्रवेशद्वारमा आगन्तुकहरूले नेपालको प्राचीन इतिहास र जीवन्त संस्कृतिको अनुभव गर्न पाउँछन् । प्रवेशद्वारमै प्रस्तरका कलात्मक मूर्ति सजिएका छन् ।

यी मूर्तिहरू ललितपुरको ऐतिहासिक कला नगरी बुङमतीका सिद्धहस्त स्थानीय कलाकारहरूले कुँदेका हुन् । होटलका भित्तामा नेपाली काष्ठकलाका गौरव टुँडालहरू कलात्मक रूपमा सजिएका छन् । होटलभित्र छिर्नासाथ पुरानो मल्लकालीन दरबार वा सांस्कृतिक सम्पदाभित्र प्रवेश गरेको भान हुन्छ ।

हस्तनिर्मित फर्निचर, तेलिया इँटा र मेलम्चीका ढुंगाले नेपालीपन झल्काएको छ । लुइँटेलका अनुसार, होटलमा सम्भव भएसम्म र भेटिएसम्मका सबै सामानहरू नेपाली नै प्रयोग गरिएका छन् । होटलका कोठा तथा बैठकमा राखिएका फर्निचरहरू कालिगढहरूले हातैले बनाएका हुन् ।

कोठाका टेबलहरूमा समेत नेपाली हस्तकलाको पहिचान बोकेको ‘आँखीझ्याल’ को बुट्टा कुँदिएको छ । भित्ताहरूमा परम्परागत सुर्की र चुना लगाइएको छ भने भुइँमा तेलिया इँटा छन्, यसले पुरानो शैलीको नेपाली घरको आनन्द र शीतलता प्रदान गर्छ ।

भर्‍याङमा सिन्धुपाल्चोकको मेलम्ची क्षेत्रबाट ल्याइएका ढुंगा बिच्छ्याइएका छन् । ‘पर्यटकलाई नेपाली कला, माटो र प्रविधिको स्वाद पस्कन खोजेका हौं । त्यसैले भेटिएसम्मका हरेक चिज स्वदेशी नै प्रयोग गरेका छौं,’ लुइँटेल भन्छन् ।

होटलमा २५ वटा आकर्षक कोठा छन्, जसमा ४ वटा विशेष स्टुडियो अपार्टमेन्ट छन् । स्टुडियो अपार्टमेन्ट विशेष गरी लामो समय काठमाडौंमा बस्न चाहने पाहुना लक्षित गरी निर्माण गरिएको हो । यिनमा बैठक कोठा, बेडरुम, अत्याधुनिक भान्छा छ ।

बौद्ध क्षेत्र विश्वभरका बौद्ध धर्मालम्बी र अनुसन्धानकर्ताहरूको प्रमुख केन्द्र हो । यहाँ बौद्ध दर्शन र धर्मको अध्ययन र ध्यानका लागि हरेक वर्ष सयौं विदेशी विद्यार्थी र भिक्षु आउँछन् । विदेशी विद्यार्थी वा पर्यटकहरूले कोठा भाडामा लिएर बस्दा सुरक्षा, सरसफाइ, पानी जस्ता दैनिक व्यवस्थापनमा कठिनाइ भोग्नुपर्छ । त्यस्ता पाहुनाले स्टुडियो अपार्टमेन्टमा बस्दा होटलको सुविधा त पाउँछन् नै, साथमा आफ्नो कोठाको भान्छामा चिया र नास्ता आफैं पकाएर खान पाउँछन् ।

नेपाल आउने अधिकांश विदेशी भारत, चीन, थाइल्याण्ड, म्यानमार, श्रीलंका र भियतनामबाट पर्यटक वा तीर्थयात्रीका रुपमा आउँछन् । तीनको मुख्य गन्तव्य पशुपतिनाथ, स्वयम्भू, बौद्धनाथ र दरबार क्षेत्र हुने गर्छ । हिन्दु र बौद्ध दुवै धर्मको आस्थाको केन्द्र नजिकै रहेकाले बौद्ध बुटिक इनले यी क्षेत्रमा आउने तीर्थयात्रीलाई उत्कृष्ट आतिथ्य दिने लक्ष्य राखेको छ ।

होटल ऐतिहासिक बौद्ध स्तुपाको नजिकै छ । होटलका माथिल्ला तला र छतबाट बौद्ध स्तुपा प्रष्टसँग देखिन्छन् । बिहान र बेलुकाको समयमा कोठाबाटै वा छतमा बसेर कफीको चुस्की लिँदै बौद्धको शान्त र आध्यात्मिक वातावरणको आनन्द लिन पाउनु यहाँको बसाइको अविस्मरणीय अनुभव हुनेछ ।