काठमाडौं । राष्ट्रिय सहकारी नियमन प्राधिकरणले बचत तथा ऋणमुखी सहकारीहरूको दर्ता अभिलेखीकरणका लागि नयाँ ‘सफ्टवेयर’ आधारित अनलाइन प्रणाली सुरु गरेको छ । बुधबार ललितपुरको पाटनमा आयोजित कार्यक्रममा प्राधिकरणले सहकारी सञ्चालक वा व्यवस्थापन पक्षको भौतिक उपस्थिति आवश्यक नपर्ने स्वचालित दर्ता प्रक्रिया सार्वजनिक गर्यो ।
कार्यक्रममा प्राधिकरणका अध्यक्ष डा. खगराज शर्माले सहकारीहरूलाई कर्जा सूचना केन्द्रको सदस्य बन्न सक्ने व्यवस्था गरिएको र निक्षेप तथा कर्जा सुरक्षा कोषमा समावेश हुने प्रक्रिया सहज बनाइने जानकारी दिए । उनले सहकारी क्षेत्रका पुराना समस्याहरू समाधान गर्दै सम्पत्ति शुद्धीकरणसम्बन्धी नियम कडाइका साथ कार्यान्वयन गरिने बताए ।
राष्ट्रिय सहकारी महासंघका उपाध्यक्ष डिबी बस्नेतले सहकारीहरूको संरचना र संख्या अनुसार प्रणालीलाई थप उपयोगी बनाउन आग्रह गरे । नेपाल बचत तथा ऋण केन्द्रीय सहकारी संघका कोषाध्यक्ष दीपक थापाले प्रारम्भिक सहकारीहरूलाई वित्तीय पृष्ठपोषण र सहजीकरण आवश्यक रहेको उल्लेख गर्दै प्राधिकरणलाई सहजकर्ताको भूमिकामा काम गर्न सुझाव दिए ।
राष्ट्रिय सहकारी बैंकका सीईओ बद्री गुरागाईंले नयाँ प्रणालीले तथ्यांक व्यवस्थापन र सम्पत्ति शुद्धीकरणमा सहयोग पुर्याउने विश्वास व्यक्त गर्दै अझ सुधार आवश्यक रहेको बताए ।
देशभरका बचत तथा ऋण सहकारीहरूको प्रभावकारी नियमन, सुपरिवेक्षण र अनुगमनका लागि सरकारद्वारा २०८१ माघ १४ गते सहकारी नियमन प्राधिकरण गठन गरिएको थियो ।
