काठमाडौं । सिंहदरबारस्थित प्रधानमन्त्री तथा मन्त्रिपरिषद्को कार्यालयमा बिहीबार बसेको मन्त्रिपरिषद् बैठकले विभिन्न महत्वपूर्ण निर्णयहरू गरेको छ।

बैठकले इण्टिग्रेटेड वाटर एण्ड सिवरेज म्यानेजमेन्ट क्षेत्रका लागि एसियाली विकास बैंक बाट प्राप्त हुने ११५ मिलियन अमेरिकी डलर सहुलियतपूर्ण ऋणसम्बन्धी सम्झौता तथा अन्य कागजातलाई अन्तिम रूप दिन अर्थ मन्त्रालयका सहसचिवको नेतृत्वमा वार्ता टोली गठन गर्ने निर्णय गरेको छ।

त्यसैगरी, २०७५ भदौ २१ को मन्त्रिपरिषद् निर्णय अनुसार महाराजगञ्जस्थित राष्ट्रिय प्रहरी प्रशिक्षण प्रतिष्ठानको ११४-३-०-० जग्गा राष्ट्रपतिको नाममा हस्तान्तरण गर्ने निर्णयलाई खारेज गर्दै उक्त जग्गा पुनः सोही राष्ट्रिय प्रहरी प्रशिक्षण प्रतिष्ठान ले नै प्रयोग गर्ने निर्णय गरिएको छ।

यस्तै, सरकारी निकायमा प्रयोग भइरहेका सफ्टवेयर तथा सूचना प्रविधिसम्बन्धी विषयमा अध्ययन गर्न सूचना तथा सञ्चार प्रविधि सल्लाहकारको संयोजकत्वमा अध्ययन कार्यदल गठन गर्ने निर्णयसमेत बैठकले गरेको छ।