बैंकको खबर । सिद्धार्थ बैंक लिमिटेड अन्तर्राष्ट्रिय स्तरको प्रतिष्ठित ‘इन्फोसिस फिन्याकल इनोभेसन अवार्ड २०२६’ अन्तर्गत ‘ग्राहक सहभागिता अधिकतम बनाउने डिजिटल-प्रथम बैंकिङ’ विधामा स्वर्ण अवार्डबाट सम्मानित भएको छ ।

विश्वभरका बैंक तथा वित्तीय संस्थाले प्रविधि, नवप्रवर्तन र ग्राहक अनुभव सुधारका क्षेत्रमा गरेका उत्कृष्ट अभ्यासहरूको मूल्यांकन गरी प्रदान गरिने उक्त अवार्डले सिद्धार्थ बैंकको डिजिटल बैंकिङप्रतिको निरन्तर प्रतिबद्धता, ग्राहक-केन्द्रित सेवा तथा उत्कृष्ट ग्राहक अनुभव प्रदान गर्ने प्रयासलाई अन्तर्राष्ट्रिय स्तरमा मान्यता दिएको बैंकले जनाएको छ ।

बैंकले ग्राहकलाई सहज, सुरक्षित र आधुनिक बैंकिङ अनुभव प्रदान गर्ने उद्देश्यले विभिन्न डिजिटल सेवाको विस्तार गर्दै आएको छ । मोबाइल बैंकिङ, क्यूआर भुक्तानी, क्यूआर कर्जा, भर्चुअल क्रेडिट कार्ड तथा डिजिटल खाता सञ्चालनजस्ता सेवामार्फत छिटो, सरल र सुविधाजनक बैंकिङ सेवा उपलब्ध गराउने बैंकको प्रयासलाई उक्त अवार्डले थप प्रोत्साहन गरेको जनाइएको छ ।

सिद्धार्थ बैंकले आगामी दिनमा पनि आधुनिक प्रविधिको अधिकतम उपयोग गर्दै डिजिटल भुक्तानी प्रणालीको विस्तार, व्यावसायिक साझेदारीको सुदृढीकरण तथा ग्राहक सन्तुष्टि अभिवृद्धिमा केन्द्रित रहने जनाएको छ ।

बैंकका अनुसार यो सम्मानले ग्राहकप्रतिको प्रतिबद्धतालाई अझ सशक्त बनाउनुका साथै भविष्यमा थप व्यवस्थित र गुणस्तरीय सेवा प्रदान गर्न प्रेरणा मिलेको छ ।