तनहुँ । मुग्लिन-पोखरा सडकखण्डअन्तर्गत तनहुँको दमौलीमा निर्माण भइरहेको चार लेनको मादी पुलको भौतिक प्रगति ८६ प्रतिशत बराबर पुगेको छ । बाँकी कामका लागि ३०० दिन म्याद थप गरिएको मुग्लिन-पोखरा सडक योजना (पूर्वी खण्ड) आयोजनाले जनाएको छ ।

चालु आर्थिक वर्षभित्र निर्माणसम्पन्न गर्ने लक्ष्य राखिए पनि काम पूरा हुन नसकेपछि समय थप गरिएको हो । आयोजानाका अनुसार पुल निर्माणको म्याद २०८४ वैशाख १६ गतेसम्म कायम भएको छ ।

व्यास नगरपालिका-४ र ५ जोड्ने मादी नदीमाथि निर्माण भइरहेको आर्क डिजाइनको पुलको काम धमाधम भइरहेको आयोजनाका इञ्जिनियर विष्णुप्रसाद पाण्डेले जानकारी दिए । उनका अनुसार केही दिनअघि म्याद थपका लागि गरिएको सिफारिसअनुसार पूर्वाधार विकास मन्त्रालयले समय थप स्वीकृत गरेको हो ।

पुल निर्माणका लागि २०७९ साउन २६ गते अनक जेभीसँग सम्झौता भएको थियो । ३१५ मिटर लामो पुलमा पाँच वटा स्पान रहनेछन् । पुलका दुवैतर्फ दुई-दुई वटा प्रिस्टे«स्ड बक्स गर्डर स्पानको काम सम्पन्न भइसकेको छ ।

इञ्जिनियर पाण्डेका अनुसार फाउन्डेसनदेखि सुपर स्ट्रक्चरको अधिकांश काम पूरा भइसकेको छ । एकतर्फको आर्क निर्माणसम्पन्न भइसकेको छ भने अर्कोतर्फको काम जारी छ ।

एक अर्ब २१ करोड लागतमा निर्माण भइरहेको यो पुल २३ मिटर चौडाइको हुनेछ । यो नेपालकै पहिलो एकल मोनोलेथिक स्ट्रक्चरयुक्त पुल भएको आयोजनाले जनाएको छ ।

पृथ्वी राजमार्गमा निर्माण भइरहेको यो पुल चार लेनको आर्क डिजाइनमा आधारित छ । हाल सञ्चालनमा रहेको दुई लेनको मादी पुल ३७० मिटर लामो छ ।