काठमाडौं । उद्योग, वाणिज्य तथा आपूर्ति मन्त्री गौरिकुमारी यादव र नेपालका लागि अमेरिकी कार्यवाहक राजदूत स्कट अर्बमबीच बिहीबार मन्त्रालयमा शिष्टाचार भेटवार्ता भएको छ। भेटमा नेपाल-अमेरिका द्विपक्षीय व्यापार, लगानी प्रवर्धन तथा आर्थिक सहकार्यका विविध विषयमा छलफल भएको मन्त्रालयले जनाएको छ।

भेटका क्रममा मन्त्री यादवले सन् १९४७ देखि कायम कूटनीतिक सम्बन्धलाई स्मरण गर्दै स्वास्थ्य, शिक्षा र आर्थिक विकासमा अमेरिकाले पुर्‍याएको सहयोगको प्रशंसा गरिन् । उनले अमेरिकामा रहेका नेपाली समुदायले दुई देशबीचको सम्बन्धलाई थप सुदृढ बनाउन महत्वपूर्ण भूमिका खेलेको उल्लेख गरिन् ।

मन्त्री यादवले सन् २०२५ मा समाप्त भएको नेपाल व्यापार सहुलियत कार्यक्रम पुनः सञ्चालन गरी नेपाली वस्तुको अमेरिकी बजारमा सहुलियतपूर्ण पहुँच सुनिश्चित गर्न सहयोग गर्न आग्रह गरिन् । साथै, व्यापार तथा लगानी ढाँचा सम्झौता अन्तर्गतको संयन्त्रलाई नियमित संवादमार्फत सक्रिय बनाउँदै व्यापार र लगानी विस्तार गर्नुपर्नेमा जोड दिइन् ।

नेपाल सरकारले लगानीमैत्री वातावरण निर्माणका लागि नीतिगत तथा कानुनी सुधार गरिरहेको उल्लेख गर्दै उनले जलविद्युत, नवीकरणीय ऊर्जा, पर्यटन पूर्वाधार, कृषि प्रशोधन, उत्पादनमूलक उद्योग तथा डिजिटल अर्थतन्त्रका क्षेत्रमा अमेरिकी लगानी बढाउन आग्रह गरिन् ।

हाल अमेरिका नेपालको दोस्रो ठूलो निर्यात गन्तव्य रहेको उल्लेख गर्दै मन्त्री यादवले व्यापार घाटा कम गर्न प्रविधि हस्तान्तरण र निजी क्षेत्रबीचको साझेदारीलाई थप सुदृढ बनाउनुपर्ने धारणा राखिन् ।

जवाफमा अमेरिकी कार्यवाहक राजदूत स्कट अर्बमले नेपालले उठाएका व्यापार सहुलियत, लगानी प्रवर्धन र द्विपक्षीय व्यापारिक संवादलाई निरन्तरता दिने विषयमा सकारात्मक प्रतिक्रिया जनाउँदै आवश्यक सहयोग र साझेदारी कायम रहने प्रतिबद्धता व्यक्त गरिन् ।