बैंकको खबर । ग्रीन डेभलपमेन्ट बैंक लिमिटेडले आर्थिक वर्ष २०८१/८२को अपरिष्कृत वित्तीय विवरण सार्वजनिक गरेको छ।
बैंकले अघिल्लो आर्थिक वर्षको तुलनामा खुद नाफा र वितरणयोग्य नाफा बढेको विवरण सार्वजनिक गरेको छ ।
गत आर्थिक वर्षको अन्त्यसम्ममा बैंकले ६ करोड ९४ लाख रुपैयाँ खुद नाफा कमाएको छ, जुन अघिल्लो वर्षको सोही अवधिको ३ करोड ८६ लाख रुपैयाँको तुलनामा ७९.५३ प्रतिशतले बढी हो।
ब्याज आम्दानीमा वृद्धि भएको र इम्पेरमेन्ट चार्जमा छुट्याउनुपर्ने रकम घटेका कारण नाफामा उल्लेख्य सुधार भएको देखिन्छ ।
समीक्षा अवधिमा बैंकको खुद ब्याज आम्दानी १७.७३ प्रतिशतले र फी तथा कमिशन आम्दानी १३.०१ प्रतिशतले वृद्धि भएको छ। त्यस्तै, कुल सञ्चालन आम्दानी १९.२६ प्रतिशतले र सञ्चालन मुनाफा ७२.७९ प्रतिशतले बढेको छ।
बैंकको इम्पेरमेन्ट चार्ज २ करोड ८९ लाख रुपैयाँबाट घटेर ६८ लाख रुपैयाँमा झरेको छ।
बैंकको वितरणयोग्य मुनाफा गतवर्षभन्दा ९४.७० प्रतिशतले वृद्धि भई ६ करोड ७ लाख रुपैयाँ पुगेको छ।
बैंकको प्रति सेयर आम्दानी पनि ५ रुपैयाँ १ पैसाले बढेर १२ रुपैयाँ १८ पैसा पुगेको छ। यस्तै प्रतिसेयर वितरणयोग्य मुनाफा १० रुपैयाँ ६७ पैसा, प्रतिसेयर नेटवर्थ १२२ रुपैयाँ ११ पैसा र मूल्य/आम्दानी अनुपात १२२.०७ गुणा रहेको छ।
५६ करोड ९६ लाख रुपैयाँ चुक्ता पुँजी रहेको बैंकसँग जगेडा कोषमा १२ करोड ५९ लाख रुपैयाँ सञ्चित छ।
बैंकले कुल ६ अर्ब ३७ करोड रुपैयाँ निक्षेप संकलन गरी ४ अर्ब ७३ करोड रुपैयाँ कर्जा प्रवाह गरेको छ।
