काठमाडौं । वाणिज्य बैंकहरुले भदौ महिनाका लागि नयाँ ब्याजदर सार्वजनिक गरेका छन् । सञ्चालनमा रहेका २० वाणिज्यमध्ये केहीले ब्याजदर घटाएका छन्। केहीले स्थिर राखेका छन भने एउटाले बढाएको छ ।

साउनमा व्यक्तिगत मुद्दति निक्षेपमा औसत ५.६९ प्रतिशत ब्याज दिएका बैंकहरुले भदौमा घटेर ५.५७ प्रतिशतमा झरेको छ। यस्तै, संस्थागत मुद्दति निक्षेपको औसत ब्याजदर ४.११ प्रतिशतबाट घटेर ३.९६ प्रतिशत कायम भएको छ ।

२० वाणिज्य बैंकमध्ये ८ वटाले भदौमा ब्याजदर घटाएका छन्, १ बैंकले बढाएको छ भने बाँकी ११ वटाले स्थिर राखेका छन्।

स्ट्याण्डर्ड चार्टर्ड बैंकले साउनमा व्यक्तिगत मुद्दतिमा ६.२६ प्रतिशत ब्याज दिँदै आएकोमा भदौका लागि घटाएर ५.१३ प्रतिशतमा पुर्‍याएको छ। विपरीत रूपमा, साउनमा सबैभन्दा कम ४.२५ प्रतिशत ब्याज दिएको प्रभु बैंकले भदौमा १.१ प्रतिशतविन्दुले बढाएर ५.३५ प्रतिशत पुर्‍याएको छ। भदौमा सबैभन्दा कम व्यक्तिगत मुद्दति निक्षेपदर लक्ष्मी सनराइज बैंकले ५ प्रतिशत तोकेको छ।

संस्थागत मुद्दति निक्षेपमा ७ वटा बैंकले ब्याजदर घटाएका छन्। बाँकीले साउनकै दरलाई निरन्तरता दिएका छन्।