बैंकको खबर । नेपाल राष्ट्र बैंकले आइतबार ४२ दिन अवधिका लागि ५० अर्ब रुपैयाँ बराबरको निक्षेप संकलन गर्ने भएको छ। वित्तीय प्रणालीमा निरन्तर अधिक तरलता रहेकाले राष्ट्र बैंकले बोलकबोलमार्फत निक्षेप संकलन उपकरण प्रयोग गर्न लागेको हो।

हाल देशको कुल निक्षेप ७६ खर्ब रुपैयाँ नाघिसकेको छ। अधिक तरलता र ब्याजदर व्यवस्थापन गर्न राष्ट्र बैंकले निक्षेप संकलन उपकरण तथा स्थायी निक्षेप सुविधामार्फत रकम तान्दै आएको छ। यस बोलकबोलमा राष्ट्र बैंकबाट इजाजतप्राप्त ‘क’, ‘ख’ र ‘ग’ वर्गका बैंक तथा वित्तीय संस्थामात्र सहभागी हुन पाउनेछन्।

बोलकबोल अनलाइन खरिद प्रणालीमार्फत हुनेछ र ब्याजदर बोलकबोलकै आधारमा निर्धारण गरिनेछ। निक्षेप संकलन उपकरणको सावाँ तथा ब्याज २०८३ साल चैत्र ८ गते भुक्तानी गरिने राष्ट्र बैंकले जनाएको छ।

बोल गर्न सकिने न्यूनतम रकम १० करोड रुपैयाँ हुनेछ भने अधिकतम रकम ५ करोड रुपैयाँका दरले भाग गर्दा निःशेष भाग जाने गरी कुल आह्वान रकमसम्म सीमित हुनेछ। बाँडफाँट गर्दा सबैभन्दा कम ब्याजदर प्रस्ताव गर्ने संस्थालाई प्राथमिकतामा राख्दै क्रमशः रकम बाँडफाँट गरिनेछ।

केन्द्रीय बैंकको खुला बजार कारोबार सम्बन्धी कार्यविधिअनुसार वित्तीय बजारमा दीर्घकालीन अधिक तरलता देखिएमा अधिकतम ६ महिनासम्मको अवधिका लागि दीर्घकालीन निक्षेप संकलन उपकरण प्रयोग गर्न सकिने व्यवस्था छ। यही व्यवस्थाअनुसार राष्ट्र बैंकले पछिल्ला दिनमा पटक–पटक निक्षेप संकलन उपकरण प्रयोग गर्दै आएको छ।