काठमाडौं । श्रम, रोजगार तथा सामाजिक सुरक्षा मन्त्रालयले श्रम ऐन, २०७४ तथा प्रचलित कानुनअनुसार प्रदान गर्नुपर्ने न्यूनतम पारिश्रमिक र सामाजिक सुरक्षासम्बन्धी व्यवस्थाहरूको पूर्ण रूपमा कार्यान्वयन गर्न सबै रोजगारदाताहरूलाई आग्रह गरेको छ ।

सोमबार जारी विज्ञप्तिमा मन्त्रालयले ऐनविपरीत न्यूनतम पारिश्रमिक वा अन्य सुविधाबाट वञ्चित गराएको पाइएमा कानुनी कारबाही गरिने स्पष्ट पार्दै सम्बन्धित सबै प्रतिष्ठान, संस्था तथा सरोकारवालाहरूलाई स्वेच्छाले कानुनको पालना गर्न अनुरोध गरेको छ।

श्रम ऐन, २०७४ को दफा १८ को उपदफा (३) अनुसार तालिमको रूपमा कार्यरत व्यक्तिहरूलाई रोजगारदाताले कम्तीमा न्यूनतम पारिश्रमिकसहित बिरामी बिदा, उपदान, सञ्चयकोष, बिमा लगायतका सामाजिक सुरक्षाका सुविधाहरू उपलब्ध गराउनुपर्ने व्यवस्था गरिएको छ।

मन्त्रालयले विभिन्न अस्पताल तथा स्वास्थ्य संस्थामा तालिमी श्रमिकका रूपमा कार्यरत स्वास्थ्यकर्मी तथा नर्सिङ स्टाफ, निजी तथा संस्थागत विद्यालयका शिक्षक तथा कर्मचारी, साथै अन्य प्रतिष्ठानमा कार्यरत व्यक्तिहरूले तोकिएको न्यूनतम पारिश्रमिक र सुविधा नपाएको सम्बन्धी उजुरी प्राप्त भएको उल्लेख गर्दै यस विषयमा गम्भीर ध्यानाकर्षण भएको जनाएको छ।