काठमाडौं । डोङफेङको भोयाले नयाँ ताइशान एक्स८ सार्वजनिक गरेको छ, जुन पाँच सिट क्षमता भएको ठूलो एसयूभी हो । यो गाडी ईभी र प्लग-इन हाइब्रिड (पीएचईभी) दुवै संस्करणमा उपलब्ध हुनेछ, जसमा पीएचईभी संस्करणले अधिकतम ३१० किमीसम्मको ईभी रेन्ज प्रदान गर्छ । ताइशान एक्स८ हुवावेको हार्मोनीओएस इकोसिस्टमको नवीनतम संस्करण प्रयोग गर्ने पहिलो गाडी हुनेछ, जसमा डुअल १५.६ इन्च २के इन्फोटेनमेन्ट स्क्रिन समावेश छन् ।

ताइशान एक्स८ भोयाको एसयूभी लाइनअपमा चौथो मोडल हो र ताइशान सिरिजअन्तर्गत दोस्रो मोडल हो । यसअघि पहिलो मोडल ‘ताइशान’ नाममै सार्वजनिक भएको थियो । एक्स८ लाई त्यसको तलको सेग्मेन्टमा राखिएको छ यद्यपि दुवै मोडलको डिजाइन र समग्र शैली मिल्दोजुल्दो छन् । एक्स८ मा ताइशानमा देखिने ठूलो क्रोम ग्रिल, पाङ्ग्रा र अन्य सजावटी तत्वहरू भने कम प्रयोग गरिएको छ ।

यस मोडलको लम्बाइ ५२०० मिमी, चौडाइ २०२५ मिमी, उचाइ १८१४ मिमी र ह्विलबेस ३०९० मिमी रहेको छ । यो फ्ल्यागसिप ताइशानको तुलनामा केही सानो आकारको छ । भोयाका अघिल्ला घोषणाहरूमा पावर ट्रिम र वैकल्पिक कन्फिगरेसनहरूमा ध्यान दिइएको थियो भने यसपटक ताइशान एक्स८ को इन्टेरियरमा हुवावेको भूमिका प्रमुख रूपमा प्रस्तुत गरिएको छ ।

भोयाका अनुसार ताइशान एक्स८ हुवावेको नयाँ पुस्ताको हार्मोनीओएस ककपिट इकोसिस्टम प्रयोग गर्ने पहिलो गाडी हुनेछ । साथै, यसमा डुअल–स्क्रिन २के १५.६ इन्च इन्फोटेनमेन्ट लेआउट हुनेछ । दुवै स्क्रिनको अधिकतम ब्राइटनेस १००० निटसम्म पुग्छ र यी छुट्टाछुट्टै वा सँगै सञ्चालन गर्न सकिन्छ । यद्यपि, कम्पनीले अहिलेसम्म इन्टेरियरको विस्तृत विवरण सार्वजनिक गरेको छैन ।

ताइशान एक्स८ मा ८०० भोल्ट प्लेटफर्म र ५सि फास्ट-चार्जिङ सुविधा हुनेछ र यो ईभी तथा पीएचईभी दुवै संस्करणमा उपलब्ध हुनेछ । पीएचईभी संस्करणमा ६५ किलोवाट क्षमताको ठूलो ब्याट्री हुनेछ, जुन सम्भवतः सिएटिएलद्वारा आपूर्ति गरिएको टर्नरी लिथियम ब्याट्री हुनेछ ।

नयाँ ईभी संस्करणमा अधिकतम १२० किलोवाट क्षमताको ब्याट्री उपलब्ध हुनेछ, जसले यसलाई ब्रान्डकै सबैभन्दा ठूलो शुद्ध ईभी एसयूभी बनाउने अपेक्षा गरिएको छ ।

ताइशान एक्स८ का लागि अर्डर बुकिङ सन् २०२६ को मध्यबाट खुल्ने अपेक्षा गरिएको छ । हालसम्म घोषणा नगरिएको भए पनि ताइशानको मूल्य ३ लाख ७९ हजार ९०० देखि ५ लाख ९ हजार ९०० युआन (करिब ५५ हजार २०० देख ७४ हजार अमेरिकी डलर) हाराहारी हुने अनुमान गरिएको छ । ताइशान एक्स८ ले बीवाईडी बाओ ८, जिकर ८एक्स र हुवावेको ऐटो एम८ जस्ता प्रतिस्पर्धीसँग ‘८-सिरिज’ एसयूभी बजारमा प्रतिस्पर्धा गर्नेछ ।

अन्तर्राष्ट्रिय बजारका लागि यसको नामबारे पनि चर्चा भइरहेको छ । भोयाको वेबसाइटमा यो मोडललाई ‘टाइटान एक्स८’ नामले उल्लेख गरिएको देखिन्छ, जसले विश्व बजारमा पनि यही नाम प्रयोग हुन सक्ने संकेत गर्छ ।