२०८१ पुस २९ गते सोमबार । 

बैंकको खबर । वाणिज्य बैंकहरुले माघ महिनाका लागि मुद्दति निक्षेपको ब्याजदर सार्वजनिक गरेका छन् । अधिकांश बैंकहरुले माघमा पनि पुस महिनाकै ब्याजदरलाई निरन्तरता दिएका छन् । 

कृषि विकास र नेपाल एसबीआई बैंकले व्यक्तिगत मुद्दति निक्षेपको ब्याजदर घटाएका छन् । अरु बैंकहरुले पुसकै ब्याजदरलाई निरन्तरता दिएका छन् । 

वाणिज्य बैंकहरुको व्यक्तिगत मुद्दति निक्षेपमा माघ महिनामा औसत ६.००१ प्रतिशत ब्याजदर कायम गरेका छन् । यो ब्याजदर पुसको तुलनामा ०.०१५५ प्रतिशत विन्दु कम हो । पुसमा औसत ब्याजदर ६.०१६५ प्रतिशत थियो । 

बैंकिङ प्रणालीमा लगानीयोग्य पैसा थुप्रिदै गएको छ । कर्जाको माग न्यून छ । यहीकारण बैंकहरुले ब्याजदर घटाउँदै लगेका छन् । तर कात्तिक यता मुद्रास्फीति दर बढ्न थालेपछि अधिकांश बैंकहरुले ब्याजदर घटाएका छैनन् । केही बैंकरले अब ब्याजदर यो भन्दा तल जान सक्ने ठाउँ नरहेको बताउँदै आएका छन् । कर्जाको माग न्यून हुँदा करिब डेढ वर्षदेखि बैंकहरुले ब्याजदर घटाउँदै आएका थिए ।