१०८१ पुस ३ गते बुधबार ।

बैंकको खबर । बैंकहरुले कर्जा विस्तार गर्न नसक्दा प्रणालीमा पैसा थुप्रिदै गएको छ । त्यसैले राष्ट्र बैंकले आज फेरी प्रणालीबाट एकैपटक एक खर्ब रुपैयाँ तान्न लागेको छ । 

केन्द्रीय बैंकले निक्षेप संकलन उपकरणको प्रयोग गर्दै बैंकिङ्ग प्रणालीमा रहेको अधिक तरलता व्यवस्थापन गर्न आज ठूलो मात्रामा पैसा बजारबाट खिच्न लागेको हो । 

यसका लागि आज दिउँसो २ बजे बोलकबोल हुने राष्ट्र बैंकले जनाएको छ । निक्षेप दिन चाहने बैंक तथा वित्तीय संस्थाले घटीमा १० करोड रुपैयाँ र बढीमा ५ करोडले भाग गर्दा निःशेष भाग जाने गरी कुल आह्वान रकमसम्म बोलकबोल गर्न सक्नेछन्।

निक्षेप संकलनको बोलकबोल ब्याजदरमा गर्नुपर्नेछ भने बहुब्याजदरमा पनि बहुबोलकबोल गर्न सकिने राष्ट्र बैंकले जनाएको छ। यस्तै बोलकबोलमा ‘क’, ‘ख’ र ‘ग’ वर्गका बैंक तथा वित्तीय संस्थामात्र सहभागी हुन पाउनेछन्। 

२१ दिनेका लागि संकलन गर्न लागेको यो पैसाको साँवा ब्याज भुक्तानी पुस २४ गते हुने राष्ट्र बैंकले जनाएको छ ।