बैंकको खबर । स्वस्तिक लघुवित्त वित्तीय संस्था लिमिटेडले साउन ३० गतेदेखि सर्वसाधारणका लागि प्राथमिक शेयर (आईपीओ) निष्काशन गर्ने भएको छ।
लघुवित्तले वैदेशिक रोजगारीमा रहेका नेपालीहरुका लागि आईपीओ निष्काशन गरि बाँडफाँट पनि गरिसकेको छ ।
कम्पनीले कुल २ लाख ३१ हजार कित्ता आईपीओ निष्काशन गर्न नेपाल धितोपत्र बोर्डबाट अनुमति पाएको थियो । जसको कुल मूल्य २ करोड ३१ लाख रुपैयाँ बराबर छ। लघुवित्तले कर्मचारीहरुका लागि १ हजार १५५ कित्ता, सामूहिक लगानी कोषका लागि ११ हजार ५५० कित्ता र वैदेशिक रोजगारमा रहेका नेपालीका लागि २३ हजार १०० कित्ता शेयर बाँडफाँट गरिसकेको छ । अब बाँकी रहेको १ लाख ९५ हजार १९५ कित्ता शेयर सर्वसाधारणका लागि सार्वजनिक रूपमा बिक्री खुला गर्न लागेको हो ।
आईपीओ खरिद गर्न चाहने लगानीकर्ताले साउन ३० गतेदेखि भदौ ३ गतेसम्म आवेदन दिन सक्नेछन् । यो अवधिमा पनि माग भएजति आवेदन नपरे निष्काशन अवधि भदौ १३ गतेसम्म लम्बिने छ । सर्वसाधारणले न्यूनतम १० कित्तादेखि अधिकतम ५ हजार कित्तासम्म आवेदन दिन सक्नेछन्।
आईपीओको निष्काशन तथा बिक्री प्रबन्धक नबिल इन्भेष्टमेन्ट बैंकिङ लिमिटेड रहेको छ। इच्छुक लगानीकर्ताले नेपाल धितोपत्र बोर्डबाट स्वीकृति प्राप्त आस्बा सेवामा सहभागी बैंक तथा वित्तीय संस्थाहरुमार्फत सि–आस्बा प्रणाली प्रयोग गरी आवेदन दिन सक्नेछन्।
