अन्तर्राष्ट्रिय । अमेरिकी राष्ट्रपति डोनाल्ड ट्रम्पले अमेरिकी संघीय रिजर्भ बैंक (केन्द्रीय बैंक) का गभर्नर कमिटिका सदस्य लिसा कुकको राजीनामा मागेका छन् । ट्रम्पले बुधबार सामाजिक सञ्जाल प्लेटफर्म ट्रुथ सोसलमा पोस्ट सेयर गर्दै उनलाई तत्काल राजीनामा दिन भनेका हुन् ।
त्यसअघि ट्रम्पका सहयोगी तथा अमेरिकी संघीय आवास वित्त एजेन्सीका प्रमुख बिल पल्टेले कुकमाथि घर खरिदमा धितो ठगीको आरोप लगाउँदै न्याय विभागबाट अनुसन्धानको माग गरेका थिए। तर उनको सो आरोप अहिलेसम्म पुष्टि भएको भने छैन । लिसा कुकले पनि कुनै बयान दिएकी छैनन् ।
बिल पल्टेले सन् २०२१ मा लिसा कुकले मिशिगनमा १५ वर्षे धितो सम्झौतामा एउटा सम्पत्ति किनेको र त्यसलाई आफ्नो प्रमुख निवासको रुपमा वर्णन गरेको, एटलान्टा, जर्जियामा ३० वर्षे सम्झौतामा अर्को सम्पत्ति किनेर पुनः आफ्नो मुख्य घरको रूपमा वर्णन गरेको आरोप लगाएका हुन् ।
पल्टेले यिनै दावीलाई आधार बनाउँदै ठगी गरेको आरोप लगाएका छन् । उनले आफ्नो स्वार्थ बचाउन झुट बोल्ने महिललाले ब्याजदर नियन्त्रण गर्ने जिम्मेवारी लिन नसक्ने बताएका छन् ।
अर्थशास्त्री लिसा कुक सन् २०२२ मे महिनामा मा फेडरल रिजर्भ बोर्डमा सामेल भएकी थितइन् । उनको यो नियुक्ति सन् २०३८सम्मका लागि हो । यसअघि उनले पूर्वराष्ट्रपति बाराक ओबामाको प्रशासनमा आर्थिक सल्लाहकार परिषद्मा काम गरेकी थिइन्। उनी फेडरल रिजर्भको बोर्डमा सामेल हुने पहिलो अफ्रिकन मुलकी अमेरिकी महिला हुन् ।
ट्रम्पले राष्ट्रपति बनेदेखि नै फेडरल रिजर्भका अध्यक्ष जेरोम पावेलको पनि कडा आलोचना गर्दै आएका छन् । उनले फेड अध्यक्षलाई ब्याजदर घटाउन दबाब दिँदै आएका छन् ।
