प्रधानमन्त्री राजीनामासँगै छानविनको घेरामा पर्नुपर्छ

काठमाडौंमा सोमबार घटेको रक्तपातले सम्पूर्ण राष्ट्रलाई स्तब्ध बनाएको छ। जेनजी आन्दोलनका क्रममा १९ युवाले अनहाकमा ज्यान गुमाउनु र करिब ४०० जना घाइते हुनु नेपालको लोकतान्त्रिक इतिहासमै दुःखद र शर्मनाक क्षण हो। आफ्नो आवाज उठाइरहेका युवा पुस्तामाथि राज्यले गरेको निर्मम दमन केवल जनतामाथि मात्र होइन, लोकतन्त्रकै मेरुदण्डमाथि भएको प्रहार हो।
जेनजी पुस्ताले सामाजिक सञ्जाल खुला गर्न र व्यापक भ्रष्टाचार अन्त्य गर्न माग गरेका थिए। यी मागहरू कुनै अस्वाभाविक वा अस्वीकार्य थिएनन्, बरु लोकतन्त्रलाई मजबुत बनाउन आवश्यक आधारभूत प्रश्नहरू थिए। तर, सरकार जनतासँग संवाद गर्ने सट्टा दमनकारी बाटोमा उत्रियो।
जनताको सुरक्षाका लागि उभिनुपर्ने सरकार आफैं दमनकारी बन्न पुग्नु गम्भीर विडम्बना हो। शान्तिपूर्ण प्रदर्शनलाई नियन्त्रण गर्ने नाममा राज्य शक्तिको अन्धाधुन्ध प्रयोग गर्नु कुनै पनि बहानाले औचित्यपूर्ण ठहरिँदैन। यसले सरकारप्रति जनविश्वास अझ कमजोर बनाएको छ।
गृहमन्त्रीले आफ्नो पदबाट राजीनामा दिएर नैतिक जिम्मेवारी वहन गर्न खोजेका छन तर घटनाको गम्भीरता हेर्दा यति मात्रै पर्याप्त हुँदैन। यस घटनाको सम्पूर्ण जिम्मेवारी प्रधानमन्त्री केपी शर्मा ओलीले लिनुपर्छ । यो त्रासदीमा सरकारले सामूहिक जिम्मेवारी लिनुपर्छ । प्रधानमन्त्री ओलीले नैतिक दबाबलाई आत्मसात् गर्दै पदत्याग गरेर स्वतन्त्र छानबिनलाई सघाउनुपर्छ।
आज प्रश्न उठेको छ—यो घटनापछि पनि सरकार सत्ता पदमा अडिरहने छ । प्रधानमन्त्री ओलीले १९ युवाको बलिदानलाई सामान्य प्रशासनिक त्रुटि भनेर पन्छाउन खोजेको देखिन्छ । उनको यो प्रयास अस्वीकार्य छ।
अबको आवश्यकता भनेको, पारदर्शी र स्वतन्त्र छानबिन हो । पीडित परिवारलाई न्याय र भविष्यमा यस्तो रक्तपात कहिल्यै नदोहरिने ग्यारेन्टी गर्नु हो । यदि सरकारले अझै पनि आफ्नो सत्ता जोगाउन मात्र ध्यान दियो भने त्यसको परिणाम अझ गम्भीर हुने निश्चित छ।
यस आन्दोलनले स्पष्ट सन्देश दिएको छ—नयाँ पुस्ता अन्याय, दमन र भ्रष्टाचार सहँदैन। यदि सरकारले यसलाई सुन्न सकेन भने जनताको विश्वास चकनाचुर हुनेछ र राजनीतिक अस्थिरता अझै गहिरिनेछ।
रक्तपातको छायाँमुनि टिकेको सरकार लोकतान्त्रिक होइन, दमनकारी मात्र हुन्छ। त्यसैले यो सरकारलाई चाहिने पहिलो कदम भनेको नैतिक जिम्मेवारीसहितको राजीनामा नै हो । प्रधानमन्त्री ओलीले राजीनामा गरेमात्रै सत्यतथ्य उजागर गर्ने वातावरण निर्माण हुन्छ । यही बाटोले मात्र शान्ति, स्थिरता र जनताको विश्वास फर्कन सक्छ।