बैंकको खबर । ​कञ्चनपुरको पुनर्वास नगरपालिका वडा नम्बर १ स्थित रामबुद्ध माध्यमिक विद्यालयका विपन्न विद्यार्थीहरूलाई आरएसडीसी लघुवित्त वित्तीय संस्थाले न्यानो लुगा वितरण गरेको छ ।

लघुवित्तको सौजन्यमा बुधबार एक विशेष समारोहका बीच विद्यार्थीहरूलाई जाडो मौसमका लागि ट्रयाकसुट वितरण गरिएको हो। ​पुनर्वास नगरपालिकाका नगर प्रमुख तोयप्रसाद शर्माको प्रमुख आतिथ्यतामा सम्पन्न उक्त कार्यक्रममा विद्यालयमा अध्ययनरत विपन्न विद्यार्थीहरूलाई लक्षित गरी १११ थान न्यानो लुगा (ट्राक सुट) कपडाहरू वितरण गरिएको लघुवित्तले जनाएको छ ।

सो अवसरमा नगर प्रमुख शर्माले शिक्षा क्षेत्रमा निजी तथा वित्तीय संस्थाहरूले पुर्‍याएको योगदानको उच्च प्रशंसा गरे ।

​कार्यक्रममा आरएसडीसी लघुवित्त वित्तीय संस्था कोहलपुर शाखाका शाखा प्रबन्धक शंकर भट्टराईले सो सहयोग उपलब्ध गराएका हुन् । शाखा प्रबन्धक भट्टराईले संस्थाको संस्थागत सामाजिक उत्तरदायित्व अन्तर्गत विद्यार्थीहरूको शैक्षिक निरन्तरतामा सहयोग पुगोस् भन्ने उद्देश्यले सहयोग गरिएको बताए।

​त्यसैगरी, कार्यक्रममा पुनर्वास नगरपालिका वडा नं. १ का अध्यक्ष मोहनलाल रानाज्यूले विशेष अतिथिको रूपमा मन्तव्य राख्दै विद्यालय र समुदायको विकासमा यस्ता सहकार्यहरू निरन्तर रहनुपर्नेमा जोड दिए ।

​विद्यालय व्यवस्थापन समितिका अध्यक्षको सभापतित्वमा सम्पन्न उक्त कार्यक्रममा विद्यालयका प्रधानाध्यापक, शिक्षक, कर्मचारी, ठूलो संख्यामा अभिभावकहरू र विद्यार्थीहरूको उत्साहजनक उपस्थिति थियो। विद्यालय परिवारले आफ्नो सामाजिक उत्तरदायित्व पूरा गरेकोमा आरएसडीसी लघुवित्त वित्तीय संस्थाप्रति आभार व्यक्त गर्दै संस्थालाई सम्मान पत्र समेत प्रदान गरेको छ ।