२०८१ मंसिर २३ गते आइतबार । 

सेयर खबर । सेयरबजारमा आज कारोबार मापक नेप्से परिसूचक ४५ दशमलव ९३ अंकले घटेर दुई हजार छ सय ८९ विन्दुमा झरेको छ । सात अर्ब ४६ करोड रुपैयाँ बराबरको एक करोड ७३ लाख ९२ हजार २४४ कित्ता सेयर किनबेच भएको छ । 

कारोबार भएका २४४ कम्पनीमध्ये २१४ वटाको सेयरमूल्य घट्दा बजार दबाबमा परेको हो । तर यसदिन २७ कम्पनीको सेयरमूल्य बढेको छ भने तीन कम्पनीको स्थिर रहेको छ । 

कारोबारमा आएका सबै समूह घटेका छन् । सबैभन्दा धेरै जीवन बीमा समूह तीन दशमलव शून्य सात प्रतिशत घटेको छ । त्यसपछि व्यापार समूह दुई दशमलव १३ प्रतिशत, जलविद्युत १.९८ प्रतिशत, बैंकिङ १.८६ प्रतिशत, फाइनानस र होटल तथा पर्यटन १.८४ प्रतिशत, लघुवित्त १.५० प्रतिशत लगानी १.३३ प्रतिशत र विकास बैंक १.०४ प्रतिशतले घटेको छ । यस्तै, निर्जीवन बीमा ०.८३, म्युचुअल फण्ड ०.५९, उत्पादन तथा प्रशोधन ०.३४ र अन्य समूह ०.८१ प्रतिशत घटेको छ । 

बजार घटेपनि खानिखोला हाइड्रोपावरको सेयरमूल्य सबैभन्दा धेरै ९.९८ प्रतिशत बढेको छ । मानुषी लघुवित्त, लाइफ इन्स्योरेन्स कर्पोरेसन (नेपाल) र जोशी हाइड्रोपावरको सेयरमूल्य १० प्रतिशत घटेर नकारात्मक सर्किट लागेको छ । यस्तै सामुदायिक लघुवित्त वित्तीय संूस्थाको सेयरमूल्य पनि ९.९७ प्रतिशतले घटेको छ । 

सबैभन्दा धेरै कारोबार एनआरएन इन्फ्रास्ट्रक्चर एण्ड डेभलपमेन्टको ३२ करोड ६४ लाख रुपैयाँ बराबरको भएको छ । 

आज लगानीकर्ताको सम्पत्ति ७६ अर्ब रुपैयाँ गुमेको छ । बजार पुँजीकरण ४४ खर्ब ६० अर्ब रुपैयाँमा झरेको छ । साधारण सेयर तर्फको पुँजीकरण २५ अर्ब रुपैयाँ घटेर १४ खर्ब ८१ अर्ब रुपैयाँमा झरेको छ ।