बैंकको खबर । आज धनतेरस । हरेक वर्ष कात्तिक कृष्ण त्रयोदशीमा धनतेरस पर्व मनाइन्छ । धार्मिक मान्यताका अनुसार समुद्र मन्थनका क्रममा अमृतको कलश लिएर देवताका वैद्य धन्वतरी प्रकट भएका थिए । 

आजको दिनलाई कुबेरको दिनका रुपमा पनि मानिन्छ । धन र सम्पन्नताका लागि कुवेरको पूजा गर्ने गरिन्छ। आज मानिसहरुले मूल्यवान धातुका साथमा नयाँ भाँडा कुडा र गरगहना किन्ने गर्छन् । त्यहि भाडा तथा मूर्तिमा दीपावलीको पूजा गर्ने प्रचलन छ ।

नेपालमा धनतेरसको दिन सुनको असर्फी र चाँदीका सिक्का किन्ने चलन पनि छ । नेपाल राष्ट्र बैंकले आज सुनको असर्फी र चाँदीको सिक्का बिक्री प्रबन्ध मिलाएको छ । केन्द्रीय बैंकले एक व्यक्तिलाई एक थान सुनको असर्फी र पाँच थानसम्म चाँदीको सिक्का बिक्री गर्ने जनाएको छ ।

राष्ट्र बैंकको टक्सार महाशाखाले २.५ ग्राम तौलका सुनको असर्फी बिक्री गर्ने जनाएको छ । आज बिहान ११ बजेदेखि दिउँसो ४ बजेसम्म असर्फी किन्न सकिनेछ । असर्फीको मूल्य भने आजको बजारमा कायम सुनको मूल्यको आधारमा निर्धारण गरिएको राष्ट्र बैंकले जनाएको छ ।

राष्ट्र बैंकले कात्तिक ११ गते देखि १४ गतेसम्म चाँदीको मेडालियन र स्मारिका बिक्री गरिने जनाएको छ । राष्ट्र बैंकले प्रतिव्यक्ति पाँच थानसम्म (गाई अंकित २५ ग्राम, गाई अंकित १० ग्राम, लक्ष्मी अंकित १० ग्राम, गणेश अंकित १० ग्राम र गजलक्ष्मी अंकित १० ग्राम) बिक्री भइरहेको जनाएको छ ।

असर्फी, चाँदीका सिक्का, खरिद गर्न ग्राहकले अनिवार्य रुपमा नक्कल नागरिकता वा सो खुल्ने प्रमाण र सोको प्रतिलिपिसहित उपस्थित हुनुपर्नेछ । असर्फी तथा मेडालियन खरिदको लागि नगद तथा क्युआरबाट भुक्तानी गर्न सकिने पनि राष्ट्र बैंकले जनाएको छ ।