वित्तीय स्थायित्व जोगाउन सफल भएको गभर्नर अधिकारीको दाबी

Banking News२०८१ चैत्र २२ गते शुक्रबार152

२०८१ चैत २२ गते शुक्रबार ।

बैंकको खबर । नेपाल राष्ट्र बैंकका गभर्नर महाप्रसाद अधिकारीको पाँच वर्षे कार्यकाल पुरा गरेका छन् । सो अवसरमा गभर्नर अधिकारीले आज पत्रकार सम्मेलन गर्दै आफ्नो कार्यकाल सफल रहेको बताएका छन् । कोभिड महामारी, रुस–युक्रेन युद्ध तथा आपूर्ति सङ्कटका कारण उत्पन्न आर्थिक चुनौतीहरूको सामना गर्दै मौद्रिक नीतिमा सुधार गरी देशको आर्थिक स्थायित्व कायम गर्न आफू सफल भएको गभर्नर अधिकारीले बताए ।

बाह्य क्षेत्रको दबाबलाई कम गर्न आवश्यक नीतिगत सुधार गरेकाले मुलुकको वित्तीय स्थायित्वलाई सबल बनाउन मद्दत पुगेको बताए ।

‘कोभिड महामारीको प्रभावलाई न्यून गर्न राष्ट्र बैंकले विभिन्न सहुलियतपूर्ण वित्तीय तथा मौद्रिक नीतिहरू लागू गरेको उनले बताए । यस्तै, जटिल परिस्थितिमा बैंक तथा वित्तीय संस्थालाई कर्जा प्रवाहमा सहजता प्रदान गर्न लचिलो नीति अवलम्बन गरेको पनि बताए ।

पछिल्लो पाँच वर्षमा डिजिटल भुक्तानी प्रणालीमा उल्लेखनीय वृद्धि भएको, मोबाइल बैंकिङ, क्युआर कोड भुक्तानी, इन्टरनेट बैंकिङ तथा डिजिटल वालेटको प्रयोग उल्लेखनीय रूपमा बढ्नुलाई आफ्नो कार्यकालको सबैभन्दा राम्रो सफलता भएको उनले बताए ।

गभर्नर अधिकारीले डिजिटल कारोबारको वृद्धिसँगै केन्द्रीय बैंकले साइबर सुरक्षालाई पनि प्राथमिकतामा राख्दै आवश्यक नीतिगत तथा प्रविधिगत सुधारहरू अवलम्बन गरेको जानकारी दिए ।

आफ्नो कार्यकालमा ११६ नीतिगत व्यवस्था तर्जुमा गरी कार्यान्वयनमा ल्याइएको जानकारी पनि उनले दिए ।

गभर्नर अधिकारीले केन्द्रीय बै्ंकको यात्रा निरन्तर रहने उल्लेख गर्दै आगामी दिनमा पनि बैंकले प्रभावकारी नीति अवलम्बन गर्दै देशको आर्थिक स्थायित्व तथा समृद्धिमा योगदान पु¥याउने विश्वास व्यक्त गरे ।

All banking information at your fingertips.