२०८१ मंसिर १९ गते बुधबार । 

सेयर खबर । सेयर बजारमा बुधबार कारोबार मापक नेप्से परिसूचक २४.९७ अंक घटेर दुई हजार सात सय ५०.८७ को बिन्दुमा झरेको छ । कारोबार रकम भने मंगलबारको तुलनामा केही बढेको छ । मंगलबार साढे आठ अर्ब हाराहारी कारोबार भएकोमा बुधबार नौ अर्ब १३ करोड २४ लाख ६८ हजार रुपैयाँ बराबरको दुई करोड तीन लाख ३२ हजार ६६ कित्ता सेयर किनबेच भएको छ । 

कारोबार भएका २४४ कम्पनीमध्ये १३२ वटाको सेयरमूल्यमा गिरावट आउँदा बजार दबाबमा परेको हो । तर यसदिन १०४ कम्पनीको सेयरमूल्य बढेको छ भने आठ कम्पनीको स्थिर रहेको छ । 

जलविद्युत् समूह ०.५९ प्रतिशत, उत्पादन तथा प्रशोधन ०.१४ प्रतिशत र लघुवित्त ०.१२ प्रतिशतले बढेको छ। बाँकी सबै समूह घटेका छन् । सबैभन्दा बढी व्यापार समूह ८.७२ प्रतिशत घटेको छ । यसअघि पाँच कारोबार दिनसम्म लगातार बढेको व्यापार समूहमा बुधबार करेक्सन आएको हो । यसअघि सात कारोबार दिन लगातार बढेको विसाल बजार कम्पनीको सेयरमूल्यमा गिरावट आउँदा व्यापार समूह दबाबमा परेको हो ।

बैंकिङ ०.३४ प्रतिशत, विकास बैंक १.९४, वित्त १.२४, होटल तथा पर्यटन ०.४० र लगानी समूह ०.०२ प्रतिशतले घटेको छ । त्यस्तै जीवन बिमा १.५०, म्युचुअल फण्ड ०.३४, निर्जीवन बिमा ०.३३ र अन्य समूह ०.७४ प्रतिशतले घटेको छ ।

खानीखोला हाइड्रोपावर कम्पनी लिमिटेडको सेयर मूल्य आज सबैभन्दा धेरै ९.९९ प्रतिशतले बढेको छ । सपोर्ट माइक्रोफाइनान्स वित्तीय संस्था लिमिटेड र लाइफ इन्स्योरेन्स कर्पोरेसन (नेपाल) लिमिटेडको सेयर मूल्यमा नकारात्मक सर्किट लागेको छ । विशाल बजार कम्पनीको सेयरमूल्य पनि ९.१७ प्रतिशत गिरावट आएको छ ।

    कारोबार रकमका आधारमा आज सबैभन्दा बढी जोशी हाइड्रोपावर डेभलपमेन्ट कम्पनीको ३० करोड ३० लाख ६९ हजार दुई सय २५ रुपैयाँ बराबरको सेयर खरिद बिक्री भएको छ ।