बैंकको खबर । बैंक तथा वित्तीय संस्थामा अधिक तरलता व्यवस्थापन गर्न नेपाल राष्ट्र बैंकले आज (माघ ४ गते आइतबार) प्रणालीबाट २० अर्ब रुपैयाँ तान्ने भएको छ ।

राष्ट्र बैंकले निक्षेप संकलन बोलकबोलमार्फत ८४ दिनको लागि सो रकम प्रणालीबाट प्रशोचन गर्न लागेको हो । गएको २ सातामा केन्द्रीय बैंकले २ खर्ब रुपैयाँ बराबरको ऋणपत्र बिक्री गरेर तरलता व्यवस्थापन गर्न खोजेको थियो । तर त्यसले मात्रै व्यवस्थापन हुन नसकेपछि आज फेरि २० अर्ब रुपैयाँ निक्षेप तान्न लागेको देखिन्छ ।

पछिल्लो समय लगानीको वातावरण बन्न नसक्दा बैंकमा पैसा थुप्रिदै गएको छ । कर्जाको माग निकै कम छ । तर निक्षेप वृद्धि बढी छ । यहीकारण प्रणालीमा करिब १३ खर्ब अधिक तरलता छ ।

आजै निष्काशन हुने यो उपकरण २०८२ चैत २९ गते परिपक्व हुनेछ । निक्षेप दिन चाहने बैंक तथा वित्तीय संस्थाले घटीमा १० करोड रुपैयाँ र बढीमा ५ करोडले भाग गर्दा निःशेष भाग जाने गरी कुल आह्वान रकमसम्म आवेदन दिन सक्नेछन् ।